السيسى : صدقت فوراً على اطروحات محلب لحل قضايا النوبة

أكد الرئيس عبدالفتاح السيسي أن كل ما طرحه المهندس إبراهيم محلب مساعد رئيس الجمهورية لحل قضايا النوبة تم التصديق عليه فورا.

وقال الرئيس السيسي ـ في مداخلة له خلال الجلسة الثانية من مؤتمر الشباب المنعقد في أسوان اليوم السبت ـ لا أحد يتصور أننا منتبهين لكل المصريين بما فيهم النوبة في الوقت الراهن فقط ، إن كل القضايا والمشاكل الموجود في النوبة هي أحد مسئوليات مساعد رئيس الجمهورية المهندس إبراهيم محلب ، وكل ما يعرضه وكل ما يطلب مني بخصوص مشاكل النوبة تم التصديق عليه فورا .

وعلق المهندس محلب قائلا “أسبوعيا يرفع تقرير للرئيس السيسي لعمل اللجنة التي تضم اللواء أحمد جمال الدين وفايزة أبو النجا ومحافظ أسوان “، لافتا إلى أن الرئيس صدق في قرية الجنينة والشباك على إنشاء منطقة صناعية ، وبالتنسيق مع رئيس الوزراء تم رصد 44 مليون جنيه للمرافق .

وأضاف محلب “كانت هناك مشكلة في 44 قرية بالنوبة ، وتم عمل مسح كامل لهذه القرى لمركز بحوث البنى ووزارة الاسكان وتم الانتهاء من تلك التقارير بحيث سيتم انشاء كل المباني في ال 44 قرية مطابقة للمواصفات ، فضلا عن ترميم بعض المباني .

واشار إلى أن هيئة التخطيط العمراني تقوم حاليا بتخطيط مشروع مدينة كركر الجديدة ، وتم عرض المشروع على الاهالي في المنطقة وحين يكتمل سيتم الاعلان عنه ، موضحا أن الرئيس السيسي اعتمد مشروعات المياه والصرف الصحي في 44 قرية بالنوبة .

وأكد محلب أن الرئيس السيسي صدق على انشاء جهاز لتنمية جنوب الوادي .

وكانت إحدى سيدات النوبة قد قالت إنها تأمل في أن يتم تنفيذ كل الوعود الخاصة بأهالي النوبة في عهد الرئيس السيسي ، كما طالبت بانشاء مصنع في مركز نصر النوبة .

وقال الرئيس عبد الفتاح السيسي – في مداخلة له عقب انتهاء مساعد رئيس الجمهورية إبراهيم محلب من حديثه – “أنا هتكلم عن النوبة تاني، استنوا بس، كان ممكن قوى أقول حاضر للكلام الذي قالته الست بدور وخلاص والإعلان ساعة الخطاب بتاعي يتقال فيه الكلام كله.

وأضاف ” لكن أود أن أكرر أن الهدف من هذه اللقاءات عدم إعطاء الفرصة لأصحاب الفتن، اللي عايزين يدخلوا الدولة في مشاكل ومواجهات مع بعضها البعض، أقول لها لا، خلي بالك يا ست بدور، أنا منتبه قوى لكل المشاكل الموجودة، وإذا كان يقال أن هناك 44 قرية من قرى النوبة يتم عمل صرف صحي لها، هيقولي طب أنت بتعالج مشكلة الصرف الصحي في النوبة 100% وأنت معملتش كده مع محافظات الصعيد أو باقي محافظات الدولة، أيوه صح، أنا معملتش كده، ليه؟، أنا لقيت إن حد بيحاول يدخل على أهلي في النوبة ويعطي لهم انطباعا ليس حقيقا بأن البلد مهملة لهم عشان يعمل مشكلة للبلد، استني لو سمحت، أنا لما بقولكم كلام، أنا بقول كلام له قيمة اسمعوه، ناس عايزة تعمل فتن للبلد ديه، وتدخلنا في صراعات ملهاش لازمة، وبالتالي كان لابد أن أقول إن أحنا هنخلص كل المشاكل اللي في النوبة.”

وتابع السيسي “طب أقولكم حاجة الكلام ده مش بدء بيا، بدء من قبل مني، كان هناك 1500 وحدة سكنية تم تسليمها في 2011، زي ما قلت كده أحنا نطلع نشوف اللي ساكنين المصرف بتاع الكيما، 1500 قرية دول كام منها ساكن بالفعل رغم أنه تم تخصيصها من 2011. اسمع، انت خليك أمين مع نفسك، بقول تاني الـ1500 مسكن دول، إذا كان فيها 300 مسكن ناس عايشة جواها بالفعل بما فيها المخبز والمستشفي والمدرسة وكل شئ. ده كان معمول قبل مني أنا، مش الدولة أحنا، الدولة اللي قبل مننا.

وأردف قائلا “أنا منتبه أن الدولة بتحاول تعوض أهالي النوبة اللي قدمت الأمان والسلام من أرضها أو من أرض كانت عايشة فيها لصالح بناء السد العالي الذي أمن مصر كلها، فاحنا مش ناسين ده، ولن ننساه، ولكن ما أقوله ثانية خلي بالكوا أنا بتكلم الكلام ده وبستدعي بعض المسائل المحددة لينا كلنا يا مصريين، أنا جئت إلى هنا عشان كده، عشان تفهموا.

وأضاف ” ياساتر على أهل الشر وتخطيطها وترتيبها لإيذائنا كلنا، ويستخدمونا لنأكل بعضنا البعض، ويقول لك خلي بالك ده مش سائل فيك، خلي بالكوا دول مش واخدين بالهم منكم، خلي بالك ده مبيأكلكش، خلي بالك ده مبيعلمكش، بس لم يقل لك خلي بالك إنك فقير قوى، محدش قالك إنك أنت فقير قوى، لا يا ريت حد يقولك إن أحنا فقراء قوى، فقراء قوى، اسمع الكلام، أحنا بنقول لكم المرض، يبقي أحنا هنصمد، يبقي احنا هنكافح، يبقي احنا هنبني، يبقي احنا هنقولهم إن بالرغم من فقرنا هنطلع للأمام ونبقي كباروسيبكوا من الكلام ده.”

اخبار الان